reklama






NAVIGACIJA






Informbiro

Osoba tjedna

Kolumne

Teme

Interviewi

Picaškandal

Feral Tromblon


Greatest Shits


Kultivator

Glazba

Knjige

Film


Virtual Tribune











Stranica obnovljena:
23 rujna 2002

 Miljenko Smoje
IZ “DNEVNIKA JEDNOGA PENZIONERA”

ONI NAMA JANJCE, MI NJIMA JUDE
Miljenko Smoje
Objavljeno u Feral Tribuneu br. 481, 5. prosinca 1994.

verzija za tisak

Najžešće se bižalo iz Dalmacije u Novi svit početkon ovega vika kad je opaka peronospora uništavala naše vinograde. U to vrime vinogradarstvo je bila glavna privredna grana, recimo ka ča je posli bija turizam. Cili konvoji trabakuli i braceri iz svi dalmatinski misti plovili su svaki dan u Trst di je bilo stotine dalmatinski konob i vinotočnic. A kad je filoksera napala vinograde, tradila je loza, ni bilo vina i, naravski, ni bilo ni kruva.

Osiromašeni judi morali su bižat u svit. Proridila su se naša sela, a najskoli otoci.

Još su po našima malin mistima žive priče o tima masovnin odlascima. Dolazili su veliki vapori koji nisu mogli ni akoštat u naše male porte i usidrili bi se u konalu i judi, žene i dica brodican se pribacivali na te vele brode di i je ka stoku krcalo u stive. Americi, Auštraliji, Nju Zelandu tribala je onda radna snaga, a ni tribalo onda ni putovnic ni viza nego se iz Auštrija (jer bili smo pod Auštrijon) samo putovalo na legitimaciju. Bilo je i trgovac sa radnon snagon. Vijađ u stivu bija je u po cine, a ko ni jema pinez, moga je putovat i na dug pa kad zaradi, vraćat.

I onda kad bi došli vapori, po svin tin našin jadnin mistima orija se plač, plakali su oni koji gredu i oni koji ostaju. Jubilo se kućne prage, grlilo smokve i masline i vazimjala koja sitnica ka suvenir na rodnu grudu. Nisu, ne boj se, jemali velike kufere ni fagote. Dosta je bila i vrićica oli zavežljaj priko ramena.

Nima više peronospore, ali nima ni turizma, i čujen da se zanji godin biži iz Dalmacije žešće nego za najžešće peronospore.

Samo vrime je drugo, ne dolazu više veliki vapori, gre se udobnin, brzin reoplanima, svit naš nije više onako primitivan pa ne čini konfužjune i ne plače, ne guli kose nego se putuje ka da gre na litovanje oli u šoping.

Niti plaču oni koji putuju, niti oni koji ostaju.

ONI NAMA JANJCE, MI NJIMA JUDE
verzija za tisak

________________________________
Copyright © 1993 - 2017 Feral Tribune. All rights reserved.

NASLOVNICA

Miljenko Smoje